(1921) Dexaila que llore

link

Dexáila que llore
que el llantu ha alliviála.
Dexáila que llore
la probe el sol mal.
Ye mal de querencies
del que llega adientro
y si agarra firme
ya nunca más sal.
Dexáila que llore
que el llantu consuela.
¿La proba en’a vida,
ya que ha de face?
Los males del pechu
son males sin cura;
El bien que se esmuce
non ha de golver.

[...]

Miráila. Apagósei
la risa en los llábios,
ye la luz d’ un pabilu
la del so mirar
posaos los güeyinos,
sobr’ un cuando fala,
en sin brillu, solu
saben ya llorar.
La cara melguera.
rosina trempana,
que nunca más guapa
nel pueblu se vió;
ye hoy per les sofrencies,
farta de velorios,
com’ una azucena
que el vientu xeló.

[...]

Raitanina lloca
qu’ayeri allegraba
la quintana; juente
de claru cristal,
que como en’a juente,
el cántigu nella
yera como cosa
del su natural;
ya se-i olvidaron
aquelles tonáes,
y hoy páez la quintana
pal qu’un día la oyó,
que tien la tristura
d’ un xaulón vacíu
del qu’ el regoltosu
paxarín voló.

[...]

Palomina blanca
palomina inocente,
que apartóse un día
del so palomar,
y al tender les ales
po’ lo azul del cielu,
de manes a boca
topó col milán.

[...]

¡Probina rapaza
cómo lu quería!
¡Picaronzón de home,
cómo la dexó!
¡Non-i quedó siquiera,
el consuelu d’otres;
el de ella, anxelucu,
al nacer morrió!
Quedóse la probe
a soles consigo
y co la vergüenza
del su mal aquel.
Llorando les penes
que l’alma y llenaron;
llorando, llorando
¡y pensando n’él!

[...]

Dexáila que llore,
que el llantu consuela.
Dexáila que llore
la probe el so mal.
¡Ye mal de querencies
del que llega adientro,
y adientro s’agarra
y ya nunca sal!